Сайн байцгаана уу?

Монцемент Билдинг Материалс ХХК ийн  цахим хуудсанд та бүхэн тавтай морилно уу.

Хоёр нийгмийн шилжилтийн үе буюу 1990-ээд онтой харьцуулахад өнөөдөр үндэсний бизнес эрхлэгчид хөл дээрээ зогсож дэлхийн стандартад хүрсэн шилдэг технологи, шийдэл бүхий үйлдвэрлэл, үйлчилгээ, тогтвортой хөгжил, экспортын асуудал ярих хэмжээнд хүрчээ.

Бид энэхүү цахим хуудсаараа дамжуулан Монцемент Билдинг Материалс компанийн бахархалт ололт амжилтыг эрхэм танд дэлгэн харуулж, хэрхэн салбартаа тэргүүлж, дэлхийн энтэй сэтгэн бүтээж, алсын хараатай зорьж тэмүүлж байгаагаа танилцуулах гэсэн юм.

Манай компани тогтвортой хөгжлийн бодлогодоо тулгуурлан цементийн чанарт онцгойлон анхаарч, зах зээлд эрэлттэй байгаа болон цаашид ч өсөн нэмэгдэх хэрэгцээ болсон тусгай зориулалтын олон нэр төрлийн цементийг үйлдвэрлэхээр шаргуу ажиллаж байна.

Барилгын салбарын их бүтээн байгуулалтын ажлын үндсэн түүхий эд болох цементийн чанараас барилга, зам гүүрийн бат бэх, эдэлгээ, аюулгүй байдал шууд хамаарах учраас бид өндөр хариуцлагатай ажиллаж, бүтээгдэхүүн үйлдвэрлэлийн бүх шатанд европ, хятад, монгол инженерүүдийн багийн хамтран гаргасан хамгийн шилдэг "Стандарт ажилбарын заавар"-ыг боловсруулан мөрдөж, гурвалсан ISO стандартыг хэрэгжүүлснээр 3-хан жилийн дотор зах зээлдээ бүрэн танигджээ. Тиймдээ ч ард иргэд, хэрэглэгчид маань манай бүтээгдэхүүнд “Тэмээтэй цемент” хэмээх брэнд нэрийг өгч, чанарынх нь талаар амнаас ам дамжин, эрж сурж явааг нь сонсоод баяртай байна. Түүнчлэн зам, барилгын салбарын эрдэмтэн, судлаачид өнөөгийн Монгол Улсын зах зээлд байгаа бүх цементийг туршиж үзээд Монцементийн бүтээгдэхүүнийг цементбетон замд хэрэглэхэд хамгийн тохиромжтой, хамгийн сайн нь байсан талаарх таатай мэдээг бидэнд дуулгаж, хамтран ажиллах саналаа ч илэрхийлээд байна. Төр, хувийн хэвшил, бизнесийн түншлэлийг бодитоор хэрэгжүүлэхээр зорьж буй төр засаг, нийслэлийн удирдлагууд, шинжлэх ухааны хүрээлэн зэрэг байгууллагуудтай хамтран ажиллах талаарх яриа хэлэлцээрийн түвшинд явж байгаа төслүүд ч байна.

Бид зөвхөн үйлдвэрлэл эрхэлж, цементийн чанарт анхаараад зогсохгүй ажилтан бүрийн аюулгүй ажиллагаа, эрүүл мэнд, байгаль экологи, нийгмийн хариуцлагаа дээдлэн гадаад, дотоодын сонирхогч талууд, хөрөнгө оруулагчид, судалгааны институци, экспедицүүд, аж ахуйн нэгж, хувь хүмүүстэй бүх талаар хамтран ажиллаж, Монцемент Билдинг Материалс компани нь “Багахан хот улс”-ын дайтай ажиллаж байна. Тухайлбал, гурав дөрөвхөн жилийн өмнө эзгүй тал байсан газар хамгийн орчин үеийн томоохон үйлдвэр барьж, түүнийг дагалдан цахилгаан станц, төмөр зам, цэвэрлэх байгууламж, ажилчдын хотхон, цэцэрлэгт хүрээлэн, хөшөө цогцолбор, салбар үйлдвэр барьж байгуулан өдөр өдрийн нар мандахаас жаргах хүртэл их бүтээн байгуулалтыг өрнүүлсээр байна.

Эх орныхоо үнэт баялаг, нутгийн сайхан чулуугаар ирээдүй болсон иргэдийнхээ гал голомтыг барьж босгох энэ буянтай бас хариуцлагатай үйлсэд бид Та бүхэнтэй урт удаан хугацаанд, тогтвортой хамтран ажиллахад бэлэн байна.

Монгол улсын хөгжлийн бат бэх суурь - Монголын №1 Монцемент.

Н.Мөнхнасан

ТУЗ-ийн дарга